Türkmenistanyň Döwlet daşary ykdysady iş banky “Galkynyş” atly täze töleg ulgamyny işläp taýýarlady. Bu bolsa raýatlara hem-de hukuk şahslara ýokary hilli bank hyzmatlaryny hödürlemäge we ýurdumyzda maliýe amallarynyň netijeliligini ýokarlandyrmaga mümkinçilik berer. Ykdysadyýeti sanlylaşdyrmak boýunça Döwlet maksatnamasyny durmuşa geçirmegiň çäklerinde Türkmenistanyň Döwlet daşary ykdysady iş banky innowasion çözgütleri işjeň ornaşdyrýar. “Galkynyş” töleg ulgamy bu babatda nobatdaky möhüm ädim bolup, ilat we işewürlik üçin maliýe amallarynyň amatlylygyny we howpsuzlygyny üpjün eder. Prezident Serdar Berdimuhamedow Türkmenistanyň Döwlet daşary ykdysady iş bankynda girizilmegi meýilleşdirilýän “Galkynyş” töleg ulgamy bilen baglanyşykly teklibi makullap, degişli işleri geçirmegi tabşyrdy.